ఆది అంతాలమధ్యన
---------రావెల పురుషోత్తమ రావు.
-----------------------------------------------

అభం శుభం తెలియని అమాయకుడిలా
చెట్టుకొమ్మకు చిక్కువడి గిల గిలా కొట్టుకుంటున్న
గాలిపటంలా   బాల్యం.

కొండమీదనుంచి జాలువారుతూ
నడిమయాన    లోయ దారిలో ఘనీభవించిన
జలపాతంలా యవ్వనం

నాలుగు బజార్లకూడలిలోనిలబడి
ఎటుపోవాలో దారితెలియక
నడమంత్రపు ఆలోచనలతో
ఉట్టికెగబ్రాగలేక కిందకు దిగ జారలేక
విచికిత్సలో ఊగిసలాడుతూన్న పాంధుడిలా
  నడిమివయసు కాలం.


రాలి పడడానికి సిద్ధమయి గతపుటూహల తలపులతో
శిశిర పత్రంలా చిరుగాలికికూడా వణికిపోతూ
అస్తమించేసూర్యునికి అభిముఖంగా ప్రాకులాడుతూ
ఆత్మబంధువులా,శేషప్రశ్నగా, మిడుకుతూన్న     వృద్ధాప్యం.
----------------------------------------------------------------