నిరవధి సుఖదా-------
---------------------
ఎదురుతెన్నుల్లో ఎంత హాయి ఉందో అంతకుమించిన ఆవేదనా
 అందులోనే మిళితమై వుంటుందని తెలుసుకున్నాను.


ప్లాట్ ఫార్మ్ దాటివెడుతున్న బోగీలవంకా
అది పరుగెత్తిన ఇనుప బద్దీలవంకా
ఎంత ఆశగాచూసినా ప్రయోజనం మాత్రం
శూన్యమనే ఇట్టే గ్రహించాను.

మనసు అడుగుపొరల్లో దాచుకున్న అభిమానం
కనుకొలకుల్లోకి నీటిని దట్టిస్తుందని తెలిసి తెలిసీ
ఆ ఎదురుచూపులకోసమే క్షణాలనూ గంటలనూ
రోజులనూ పక్షాలనూ, నెలలనూ ఏండ్లనూ పూండ్లనూ
ఇట్టే ఖర్చు పెట్టేస్తున్నాను.అవి జీవితంలో ఎంత భాగాన్ని
దోచేయడమో దాచేయడమో చేస్తుందని తెలుసుకొనికూడా
యేమీ చేయలేని నిస్తబ్ధతకు లోనయి విలపిస్తున్నాను.


ప్రేమ ఎంతోమధురమని తలచానేగానీ అది చేదుగుళికగానూ

పరిణమిస్తుందని ఇప్పుడు తెలుసుకునినిరామయజగత్తులోకి
నిరవద్యంగా ఒక్కోమెట్టూ క్రిందకు  జారి పడిపోతూ ఆక్రందిస్తున్నాను.

మనిషికీ మనసుకూ మధ్యన ఇంత అగాధమైన అనుభూతి సంద్రందాగుందని తెలుసుకునేలోపే ఆశలనన్నింటినీ
ఆవిరి చేసుకునే దిశను అనాలోచితంగా  ఆవిష్కరింపజేసుకుంటున్నాను.

================================================