దేవుడా నాదేశాన్ని రక్షించు!!!
-------------------------------రావెల పురుషొత్తమ రావు.
ధన సంపాదనా వ్యామోహంలో పడి
కని పెంచిన తల్లిదండ్రులను తమవంతు కాదనుకుని
శుష్క ప్రియంగా వాదించుకుంటున్న కొడుకుల
 మనోదౌర్బల్యాల మనస్తత్వాలనుండి.

అక్రమ క్రమంలో అన్ని అవినీతి మార్గాలలో
లక్షల కోట్లనువెనకేసుకునిరాష్ట్రాలనూ, దేశాలనూ పాలించగలమన్న ధీమాతొ తిరుగాడుతూ
పేట్రేగిపోతున్న విక్రమర్కుడి మార్కు అరాజకీయ నేతల కబంధ హస్తాలనుండి

అమాయకం గా ఆడపిల్లలను వలలో వేసుకుని
నటీమణులుగా తీర్చిదిద్దుతామని ఆశపెట్టి
వాళ్ళ మాన ప్రాణాలతో ఆడుకోవడం క్రీడగా మలచుకున్న
మన్మధాకృతిని దాల్చుకున్న చిత్ర విచిత్ర మగ మృగాల బారినుండి

విద్యనూ వైద్యాన్నీ వ్యాపారంగాజేసుకుని కల్తీ మందులతో ,వ్యర్ధమైన చదువులతో 
జన ప్రాణాలను బలితీసుకుంటున్న
 వైద్య నారాయణులనుండి,విద్యా వాణిజ్యపు అపర సరస్వతుల 
విష పన్నగాల పన్నాగాల నుండి

అవసరానికి అందకుండా సాగుబడికవసరమైన ఎరువులనూ
క్రిమిసం హారకమందులనూ అమ్ముకుని కోట్లను వెనకేసుకుని
కర్షకులను కష్టాల కడలులలోకి నెట్టేసే  వాణిజ్యమ్మన్యులనుంచి

మతం ముసుగులో మారణ హోమాలను సృష్టిస్తూ
అమాయకుల ప్రాణాలను పణం గాపెట్టి ఆడుకుంటున్న చాందస వాదుల
క్రూరాతి క్రూరమైన రాక్షస చర్యలనుండి.
దేవుడా నాదేశాన్ని రక్షించు!!    11-2-15