అంతరాంతరం
----------------రావెలపురుషోత్తమరావు
==========================================
అంగట్లో రతనాలు
అమ్మిన తరం నాదికాదు
ఇంటి వాకిట్లోనే అమ్మతనాన్ని
అమ్ముకుంటున్న తరం నాది.

స్వాతంత్రంకోసం స్వార్ధాన్ని
త్యాగం చేసిన తరం నాదికాదు
స్వార్ధంకోసం స్వాతంత్రాన్ని
త్యాగంచేయగల తరం నాది

విదేశీ వస్తు బహిష్కరణలో
పాల్గొన్న తరం నాదికాదు.
విదేశీ విద్య,ఉద్యోగాలకోసం
మేధోవలసల వారసత్వం నాది.

కవిత్వానికి 
గజారోహణం గావించిన ఘనమైన తరం నాదికాదు
కవిత్వాన్న్ని ఆస్వాదించడమే 
కను మరుగు చేసుకుంటున్న  కబోది తరం నాది.
==========================20-2-15