నిన్నటినేపధ్యంలో
************************
అసుర సంధ్య వేళ
మల్లెలు గుచ్చుకుంటూ ఇంటామె
కధల పుస్తకం ముందేసుకుని నేను
ఇది నిన్నటి దృశ్యం------

ఇద్దరిమధ్యా రసరంజనిలా
చిరు దరహాసాల మృదుచంద్రికలు.
ఇవ్వాళ కొత్త నేపధ్యం  చోటు చేసుకుంది.

ఆవిడకూర్చునే కుర్చీలో
మౌనం తిష్ట వేసుక్కూర్చుంది.
ఆవిడ చాయా చిత్రం క్రింద
అగరొత్తుల ధూపం సుడులు తిరుగుతూ
నన్ను ఉక్కిబిక్క్కిరిచేస్తూ
ఊపిరిని బిగబట్టేస్తున్నది.


నిన్నటికీ ఇవ్వాల్టికీ మధ్యన
విధి చేసిన వికటాట్టా హాసం.
దిగంతాలదరికి ఆవిడనూ
ఏకాంతంలోకి నన్నూ నెట్టేసింది.
కాలం మౌనరాగాన్నాలపిస్తూ
కఱకు గుండెకు నిర్వచనమై నిలిచిపోయింది.
=================================